ვერის ბაღი - (ყოფილი სერგეი კიროვის სახელობის ბაღი) – მდებარეობს მერაბ კოსტავასა და ნიკო ნიკოლაძის ქუჩების გადაკვეთაზე, ყოფილი ვერის სასაფლაოს ტერიტორიაზე, სადაც დარჩენილია დ. ჭონქაძისა და ლ. არდაზიანის საფლავები. ბაღის მშენებლობა დაიწყო 1933 წელს, აგრონომ ა. მაჭავარიანის პროექტით, ფართობი 4.0 ჰა. პარკებისა და ტყეპარკის კომპოზიციებში იზრდება 61 სახეობის მერქნიანი მცენარე, მათგან წიწვოვანის - 10 სახეობა.

რეკონსტრუქციის შემდეგ ბაღის სპორტულ კომპლექსში შედის კალათბურთის დარბაზი, 4 საჩოგბურთო მოედანი, ჭადრაკის სასახლე, ალპური კლუბი და სხვა...

 საქართველოს  სატყეო მეურნეობის სახელმწიფო  დეპარტამენტის დენდროლოგიური პარკი

საქართველოს  სატყეო მეურნეობის სახელმწიფო  დეპარტამენტის დენდროლოგიური პარკი - გაშენებულია თბილისის წყალსაცავის მიმდებარე ტერიტორიაზე 1956-1970 წლებში, 300 ჰა ფართობეზე.  აქ მსოფლიო პარკმშენებლობის პრაქტიკაში პირველად გამოიყენეს დიდ ფართობზე 15-20 წლიანი, კომით გადატანილი, ხეები და ბუჩქები, რომლებიც შემოიტანეს საქართველოს ყველა სატყეო მეურნეობიდან და კავკასიის ბოტანიკური ბაღებიდან. პარკში მსოფლიოს ყველა გეოგრაფიული სარტყელიდან  700-ზე მეტი სახეობის მცენარეა. პარკი მდიდარია  სამკურნალო მცენარეებით, აქვს სანერგე და სასათბურე მეურნეობა.დენდრო პარკი ასრულებს სამეცნიერო-სასწავლო და კულტურულ-საგანმანათლებლო ფუნქციას. პარკის გაშენდა ი. ჩოდრიშვილის მიერ.